返回上一頁

6大搵工面試「經常被忽略」嘅基本技巧

May 23, 2023 / 職涯發展

搵工又好,見工又好,作為打工仔梗係想搵必勝貼士。然而,當你喺Google搜尋相關資訊,資訊量太多,反而睇到頭都大埋。但你有無諗過,技巧同經驗你唔係無,只係你忽略咗無好好利用或者整理。今次就等筆者同大家列舉返一啲大家都了解,但自己忽略咗嘅要點畀大家,等你重新調整你嘅求職策略!即刻開始!

1. 明示暗示話畀HR知:You are the chosen one!

HR 一日收到幾十份甚至幾百份 CV,要搵合適嘅人選,無可能每一份都睇,佢哋可能會利用唔同工具做 filtering(例如睇下 CV 入面有無相關keywords),再畀 junior 嘅 HR 同事用肉眼做 screening(例如睇下年資經驗)。但唔係每個 HR 都清楚聘請緊嘅職位,係需要一個點嘅人,所以基本上,都係簡單地睇下 CV 同 job ad 入嘅 job description match 唔 match。

所以,喺send CV之前,不妨睇下你嘅 CV 係咪有符合 job ad 內容嘅 keywords 同埋描述,再將你嘅技能同經驗表達清楚啦!

2. 見到心儀嘅職位 Apply之外你仲可以做多啲

而家 apply 工好方便,輕輕 click <申請>或者就可以 send CV 畀心儀嘅公司,但個個都係咁做,點樣先可以增加自己得到面試嘅機會呢?出外靠朋友,嘗試睇下身邊有無朋友親人喺心儀嘅公司工作,探聽下究竟公司需要一個咩類型嘅員工,了解更多公司文化,做足功課。如果可以幫手做埋 referral 或者認識到 HR 同事,咁就更理想!無呢個「朋友」的話,可以試下「打cold call」,用打電話查詢嘅方式,問多啲有關職位嘅資料,等佢哋記得有你呢個人都係一個方法。

3. CV並唔係一份走天涯

世界上無一份完美嘅 CV,只有相對適合嘅 CV。千祈唔好以為一份 CV 可以 for 100 個唔同嘅職位,每一份工都有唔同嘅技能需要,而你嘅 CV 就要需要做少少 adjustment 去配合返,例如改下用唔同嘅字眼,hightlight 返啲比較合適嘅技能同埋經驗,為唔同職位度身訂造最 match 嘅 CV。

4. 見工唔一定要「死咕咕」

係嘅,喺整個求職過程入面,求職者必須畀到面試官一個「專業」、「Presentable」同「有能力」嘅印象。但當每個人都係咁,就變得唔 outstanding。

簡單喺 CV 同埋 email 來往當中,面試官未必知道你嘅個性係點。可能你喺見工過程入面嘅對答有 model answer,用嘅措辭亦係完美,但有準備嘅求職者,幾乎個個都一樣,說實了,大家都係演員,扮演一個最完美嘅打工仔。倒不如試下表達自己專業之外,表現出自己比較友善,風趣幽默,誠實嘅一面啦!

5. LinkedIn 係你存在喺職場上嘅證明

根據非正式統計,超過 90% 嘅 HR 會用 LinkedIn 作為佢哋主要嘅「收風」工具。如果你未有 account,請你而家就擺自己嘅 profile 同經驗上 LinkedIn!試諗下,當 HR 收到你嘅 CV,想知道你更多唔同嘅資料嗰陣,佢會喺 LinkedIn 度 search,但搵唔到你;同時佢喺呢個平台搵到其他申請者,咁你仲有把握單憑一封 CV 會吸引到 HR?

6. Thank you letter 比你想像中重要

當每一個申請者嘅對答,技能同經驗都係類似嘅時候,點樣令面試官覺得你更加特別,更加出眾?就係做啲其他人覺得無用嘅嘢。一封 Thank you letter 唔會浪費你好多時間,但呢一個舉動會令佢哋覺得你同其他人唔一樣。當然,唔係機械式嘅多謝,而係度身訂造,可以加插一啲喺面試入面嘅經歷同埋感受。

面試官,不論係 HR 定聘請職位嘅部門主管,佢哋都係活生生嘅人,除咗會睇事實(你嘅能力、經驗、對答),仲要被情感所影響,做多其他人一步,你成功又近一步。

遇到問題嗎?